Kari Synnøve og Jan Idar overtok Haugen gard frå Jan Idar sine foreldre i 1993. Det var behov for eit alternativt skuletilbod i kommunen, og hausten 2003 starta dei gardsskule med fire elevar. I løpet av hausten blei det sju elevar på gardsskulen, og sidan har det vore mellom 10 og 35 elevar på garden kvar veke, fordelt på opp til tre dagar.

Jan Idar har, i tillegg til å vera bonde, utdanning innan økonomi og administrasjon. Kari Synnøve var ferdig utdanna adjunkt i 1995 og jobba fleire år i den vanlege skulen. I lag tok dei vidareutdanninga "Garden som pedagogisk ressurs" i 2005. Kari Synnøve tok òg vidareutdanning i dyreassistert terapi og psykososialt arbeid med barn og unge.

Både garden og gardsskulen har vore i kontinuerlig utvikling og Jan Idar og Kari Synnøve har utvikla ein gard med allsidig drift. Haugen gard fekk bygdeutviklingsprisen i Rogaland i 2010, og er blant dei i Noreg som har drive lengst med Inn på tunet for skulen.

I dag har garden fleire tilsette med kompetanse innan blant anna agronomi, pedagogikk og mekaniske fag, i tillegg til medarbeidarane som er med elevane frå skulane. Borghild Velde Eskeland har vore tilsett som lærar på gardsskulen sidan 2017, og saman med Jan Idar er ho sentral i gardsskulen som er i stadig utvikling og drift. Kari Synnøve har dei seinare åra hatt arbeid utanom garden.

Jan Idar og Kari Synnøve har fem barn som har vakse opp på garden: Ingvild, Kjersti, Olav Johan, Helene og Maren.

Haugen gard er ein gard i full drift som har skule attåt. Mange som driv med Inn på tunet har redusert gardsdrift og held dyr i hovudsak for aktiviteten si skuld. På Haugen får elevane unik kunnskap om årssyklusar, dyr og kva det vil seie å drive ein gard. 

I 2002 sto nytt våningshus klart, og fleire år med oppgraderingar på garden venta. Ny mjølkefjos med lausdrift sto ferdig i 2007, den gamle løa er bygd om til slaktegrisproduksjon og på låven er det sauefjos, stall og verkstad. Garasjen er utstyrt for mekking.

Det gamle eldhuset på garden blei ferdig restaurert i 2009 og fungerer som klasserom for gardsskulen, med kjøkkenkrok og toalett. Fjosloftet, over mjølkeroboten og kontoret i fjosen, blir òg nytta som klasserom og til andre tilstelningar. Der er det utsyn over dyra i fjosen, kjøkken, toaletter, vaskerom og dusj. Det gamle mjølkerommet er bygd om til garderobar for elevane og medarbeidarane. 

I skogen ved garden finst mellom anna bålplassar, gapahukar, jungelløyper, turveier, sopp og ryddingsarbeid. 

Dyra er sjølvsagt heilt sentrale på gardsskulen, og i tillegg til produksjonsdyra har garden ei lang rekke "hobbydyr". Blant desse er fleire hestar, geiter, hundar, kattar, kaniner, høner, og mange forskjellige fuglar som bur i "dyrehagen" på garden.

Haugen gard er ein gard i full drift, med moderne fjos med mjølkerobot og datastyrt foring. Det bur hundrevis av dyr på garden, flest i talet er storfe, sauer og gris. 

Til driftsgrunnlaget høyrer 270 dekar dyrka mark og ca. 400 dekar gjødsla beite. I tillegg blir det kjøpt ein del fôr frå andre grovfôrprodusentar. Sauene går på fjellbeite i Sauda om somrane. Mjølkekvoten er på over 600 000 liter, med 70 årskyr, nokre ammekyr og totalt ca. 200 storfe: norsk rødt fe og forskjellige kjøttferasar. Sauene er òg av forskjellige rasar og ca. 100 vinterfôra. Kvar vår kjem eit par hundre lam til verda. Garden har plass til 160 slaktegris om gongen og slaktar opp til 6-700 gris årleg. 

Mange folk og bilar er innom garden i løpet av ei veke. Blant dei er mjølkebil, slaktebil, tankbilar og trailerar med fôr, elektrikar og servicefolk. Fleire traktorar, landbruksreiskap, robotar og maskinar er viktige i drifta. Stor aktivitet og brei fagkunnskap høyrer med på garden. 

Sidan Jan Idar (bonden) er mykje med i skuledrifta er det tilsett  ein del hjelp til gardsarbeidet.