Vårt hovudmål er å sjå elevane, møte elevane med respekt og skape positive og gode relasjonar. Det er rom for humor, spontanitet og glede, samstundes som at alle kan ein vanskeleg dag og få aksept for det. Gjennom trivsel, praktiske oppgåver og tilrettelagte aktivitetar byggjer me motivasjon til meistring. Dette er eit godt grunnlag for ein ny start.

Skulen er blitt meir og meir teoretisk og har mindre muligheter for praktisk opplærling. Det hender at elevar kjem i ein negativ sirkel fordi dei gong etter gong opplever nederlag og at dei ikkje får til skuletinga. Det skal ikkje alltid så mykje til for å snu det. Fleire gonger har me sett at ein positiv og heilt annleis dag i veka er nok!

Me ser at læring føregår på mange nivå på garden. Det er viktig sosial trening i forhold til medelevar, vaksne og dyr. Sidan det er ulike skular elevane kjem frå, treff dei nye folk og det oppstår nye vennskap på tvers av bygdene.

Mange fag er representert i løpet av ein dag, gjennom praktiske oppgåver og læring ved å gjera. Motivasjonen for å ta imot kunnskapen er ofte heilt annleis for eleven — det opplevest ikkje som skule. Dei mange ulike dyra på garden gjer at dei fleste kan finna seg eit dyreslag dei trivst med. Det er mange jobbar både på garden og i skogen.

Etter kvar skuledag vert det sendt rapport i form av ein lettlest mail til skulen/heimen. Dermed kan ein også jobbe videre med gardsdagen på ulike måtar.

Me har mange ulike dyr, ein gard i full drift og mykje å halda ved like. Dyra skal ha stell, rett og passeleg fôr, dei skal merkast, teljast og ha gode stader å bu. På garden er det reelle ting som oppstår, det er ikkje konstruert eller oppdikta. Dyrlegen kjem når hen må og me er med på det som er naturleg å ta del i. Vert det fødd ein kalv eller dyr vert sjuke, må me ta hand om det før me fortset med det me skulle...

Me snekrar, skrur, fiksar og øver på praktiske ferdigheter som trengs i ulike arbeidsoppgåver. Når det er mogeleg tek me elevane med på byggeprosessar frå fundament til siste fjøl. Me vil visa at det krev tålmod og tid å fullføra ting. Mange byggverk på garden er prega av at dei er ledd i elevprosjekt. 

I skogen jobbar me mykje med å rydde beite eller lage ved. Då ynskjer me at tre som vert felt skal kvistast, delast og fraktast til gards for køyving og pakking. Me ryddar også brake, det er kjekt fordi det viser så godt igjen!

Utfordringa for dei som jobbar på gardsskulen er å gripa tak i situasjonane som oppstår og skape fagleg læring ut av dei. Den praktiske læringa kan knyttast direkte til læreplanane i naturfag, kunst og handverk, samfunnsfag, norsk, mat og helse, matematikk og kroppsøving. Også musikk og engelsk flettar me inn i morgonsamlingane, som ein del av det sosiale fellesskapet.

Me er svært bevisste på å bruka rette omgrep på det me snakkar om. Gi rette namn på verktøy, jobbar me skal utføre, ting som skal hentast eller lokaliserast. Elevane har bruk for orda, og syner ofte at dei ønskjer å hugse dei.

Me har temadagar der me konsentrerer oss om eit emne heile dagen. Det har vore ulike tema, men oftast er dei relatert til naturfag og realkunnskap om det.

Me reiser også på ekskursjonar til ulike bedrifter og stader i nærmiljøet vårt. Mest av alt handlar det om å gi konkret erfaring med teorien, kjenna på at det er viktig å ha kunnskap og få lyst til å læra! Motivasjon, rett og slett!

Ein kan søkje om plass ein eller fleire dagar i veka. Det er mogeleg å søkje inn elevar for mindre enn eit heilt år dersom ein føler det trengs hjelp i ein overgang, men dei fleste vert søkt inn med tanke på eit lengre løp.

Gardsskulen blir rekna som ein alternativ opplæringsarena, som inneber at ein omdisponerer fag- og timefordeling for eleven. Derfor skal det føreligga ei fagleg vurdering frå PPT før ein søker. Skulen sender søknaden i samarbeid med føresette. Det er viktig å ha klart føre seg kvifor eleven kan ha nytte av å vere på Haugen gard.

Alle elevane skal ha eigen kjeledress, regnklær og støvlar på garden. Me ynskjer også at dei har eit sett med bytteklær. Dette er viktig for å sikre tilstrekkeleg hygiene og smittevern. 

Skuledagen på Haugen gard startar ca. kl. 9 og sluttar slik at alle er tilbake på skulen sin til skyssen går heim. Dagsplanen vår er slik:

• Samling
• Dyrestell
• Matpause
• Arbeidsøkt
• Oppsummering

Det er alltid nokon som lagar mat i arbeidsøkta, slik at me har litt å bite i til oppsummeringa. Ein blir ekstra svolten av å vere ute og i aktivitet på denne måten. Ein glad dag er ein god dag!